Ante as estacións de servizo formáronse longas colas de vehículos, con condutores angustiados ao ver que era imposible servirse combustible. De súpeto, as tarxetas intelixentes, que utilizan os condutores iranianos para ter acceso á gasolina subvencionada, deixaron de funcionar. A televisión estatal, citando fontes do Consello Supremo de Seguridade Nacional, confirmou que o bloqueo o provocou un ataque cibernético. O Ministerio de Petróleo limitouse a informar dun «problema técnico no sistema das tarxetas intelixentes». Tras varias horas sen servizo, as gasolineiras empezaron a funcionar de novo.