Na Coruña, un coche que circulaba pola Ronda de Outeiro quedou envorcado despois de precipitarse desde unha altura duns 8 metros ao cruce da rúa Montevideo coa rúa dos Caballeros con dúas persoas no seu interior.
Segundo a información facilitada ao 112 Galicia, as dúas persoas que viaxaban no vehículo puideron saír do coche polos seus propios medios e, posteriormente, foron trasladadas ao Complexo Hospitalario Universitario da Coruña, un home en estado leve e unha muller en estado grave.
A Policía Local confirmou que se tratou dun «pique» entre dous vehículos que tentaban adiantarse entre eles e que terminaron chocando co turismo que caeu pola ponte, alleo aos outros implicados.
Foron varias persoas particulares as que contactaron co 112 Galicia para dar conta do accidente e, axiña, o persoal do CIAE 112 Galicia puxo a situación en coñecemento de Urxencias Sanitarias de Galicia-061, dos Bombeiros da Coruña, da Policía Local e de Protección Civil.