Un home faleceu tras sufrir un grave accidente de circulación na estrada PO-301, ao seu paso pola parroquia de Cornazo, no concello de Vilagarcía de Arousa. O suceso produciuse cando o vehículo no que circulaba impactou contra outro coche que fuxiu.
A Garda Civil precisou que os dous vehículos implicados impactaron frontalmente e que a vítima mortal tiña 39 anos e residía en Vilagarcía de Arousa. Agora trata de localizar ao condutor do outro vehículo implicado que fuxiu do lugar do accidente.
A alerta activouse ás 04:50 horas da madrugada deste mércores, cando o Servizo de Urxencias Sanitarias de Galicia-061 contactou en primeiro lugar co 112 Galicia para informar do accidente. Apenas uns segundos despois, un particular chamaba tamén ao teléfono único de emerxencias para dar conta do impacto e advertir de que no interior dun dos turismos permanecía unha persoa atrapada e sen poder saír polo seus propios medios.
Con estes datos, os xestores da sala de operacións do 112 Galicia informaron de inmediato aos Bombeiros de Vilagarcía, ao Servizo de Emerxencias municipal, aos axentes da Garda Civil de Tráfico e da Policía Local, así como aos efectivos de Protección Civil da localidade.
Unha vez no punto, os equipos de emerxencias tiveron que empregar o material de excarceración para poder liberar á vítima do interior do habitáculo. Tras ser rescatado, o condutor foi atendido polo persoal sanitario, que informou do seu estado de extrema gravidade. A pesar dos esforzos dos efectivos desprazados, o home faleceu tras ser trasladado ao centro hospitalario de referencia.