Un grupo de mozas e mozos que participan no campamento de verán que se celebra no albergue xuvenil Aeródromo da Fervenza tiveron o seu primeiro contacto coa aeronáutica a través de obradoiros formativos e lúdicos.
As rapazas e rapaces que se dan cita neste campamento teñen idades comprendidas entre os 14 e os 17 anos. As actividades comezaron o pasado día 30 de agosto e rematarán o vindeiro domingo, día 6. Ademais de achegarse ao campo da aeronáutica, o campamento inclúe actividades de multiaventura en contacto coa natureza.
En total, esta Campaña de Verán, que leva por título O verán que necesitas, pon á disposición da mocidade 6872 prazas en diferentes actividades e campamentos. Todas as actividades desta campaña seguen as medidas de prevención fronte ao covid-19 fixadas polas autoridades sanitarias co fin de garantir a seguridade de todas as persoas participantes.