O presidente da Deputación da Coruña, Valentín González Formoso, realizou este xoves unha visita institucional ao Concello de Malpica, onde foi recibido polo alcalde, Walter Pardo Añón, e os membros da corporación municipal.
Na recepción oficial que tivo lugar no salón de plenos, o alcalde de Malpica destacou a importancia que teñen os investimentos da Deputación para mellorar os servizos, as infraestruturas e a calidade de vida dos veciños e veciñas da vila. «É difícil pasear por Malpica sen ver a pegada da Deputación», afirmou Walter Pardo, que sostivo que a pesar deste compromiso inversor, o municipio atravesa un momento complicado e plantéxase «retos de futuro» como a creación de emprego, o apoio á pesca e o agro e o impulso a servizos básicos como o saneamento e o alumeado no rural «para os que precisamos do apoio da Deputación», apuntou o rexedor malpicán.
O presidente da Deputación cuantificou en 3,5 millóns de euros os investimentos realizados polo ente provincial en Malpica nos últimos anos, «unha cantidade importante pero que nunca é suficiente para atender todas as necesidades dunha vila». Neste sentido, en resposta aos retos estratéxicos plantexados polo alcalde, anunciou a creación dun grupo de traballo «para aportar ideas que axuden a revitalizar esta vila da Costa da Morte, para ver por onde pode pasar o futuro e poñernos deberes», afirmou.
Ademais de financiar numerosas obras a través de programas coma o Plan Único, que permitirán por exemplo dotar de novo alumeado ao campo de fútbol de Pedra Queimada, humanizar a rúa da Igrexa ou mellorar a Avenida de Canido, a Deputación impulsa iniciativas importantes para Malpica coma a Mostra de Olería de Buño ou o proxecto das Sendas dos Faros, que terá en Punta Nariga un espectacular itinerario ciclable de 14 quilómetros de longo. Durante o ano pasado, a institución provincial apoiou con 626.346 euros a 18 entidades sociais, culturais e deportivas do municipio.
Entre estas entidades figura a Confraría de Pescadores, que Valentín González e Walter Pardo visitaron tamén, e onde conversaron cos mariñeiros sobre a difícil situación que atravesa o sector.
Os responsables da Confraría e do Fogar do Pensionista mostraron tamén ao presidente un pequeno gran tesouro que alberga o edificio: oito cadros e murais orixinais que Urbano Lugrís pintou nas paredes de distintas estancias do inmoble.