Un particular deu o aviso ao 112 Galicia minutos despois das 11 horas deste venres. Durante a conversa, indicou que presenciara como un home se metera no mar nun peirao situado nas proximidades da praia do Ézaro, en Dumbría. Engadía que a corrente parecía arrastralo.
Nada máis recibir esta información, os xestores do 112 Galicia pediron a colaboración de Urxencias Sanitarias de Galicia-061, de Salvamento Marítimo, do Servizo de Gardacostas de Galicia, dos Bombeiros de Cee e dos axentes da Garda Civil de Tráfico.
Desde Salvamento Marítimo comunicaban que mobilizaron a embarcación e o helicóptero de rescate Helimer 402.
Pouco despois, confirmouse que os particulares que estaban na zona axudaron a saír da auga ao implicado. Con todo, a ambulancia de Urxencias Sanitarias de Galicia-061 só se podía achegar a uns centos de metros de distancia, e as difíciles condicións do terreo, rochoso e con tramos de monte, levaron a que fora enviado ata o punto o helicóptero de rescate de Salvamento Marítimo, no que finalmente sería evacuado o home ao hospital.