Un home necesitou ser trasladado en helicóptero medicalizado logo de sufrir unha caída desde unha árbore, no concello pontevedrés de Forcarei.
O suceso ocorreu no monte de San Marcos, parroquia de Pardeosa, pasadas as dúas da tarde deste sábado. A esa hora, o 112 Galicia recibiu a chamada dun particular que informaba da caída e solicitaba medios para achegarse ata a vítima. Así, desde o Centro Integrado de Atención ás Emerxencias de Galicia (CIAE-112) déuselle aviso aos Bombeiros de Silleda, ao GES da Estrada, a Protección Civil do municipio, aos axentes da Garda Civil e ao persoal sanitario, que mobilizou á aeronave medicalizada de base en Santiago para facer o traslado do home.
Segundo os datos recollidos no 112, a dotación dos Bombeiros de Silleda colaborou no achegamento do ferido ata o helicóptero.