36
Medio Rural informou na noite deste xoves dun incendio declarado na parroquia de Saiar, en Caldas de Reis, para o que solicitou a situación 2 pola proximidade do lume ao núcleo da Porteliña. Segundo as primeiras estimacións, a superficie calcinada supera as 50 hectáreas e, ademais, solicitouse a intervención da Unidade Militar de Emerxencias nos traballos de extinción, para os que se mobilizaron un técnico, 4 axentes, 17 brigadas, 12 camións de bombeiros, 2 pas, 4 avións e 4 helicópteros. O vento fixo que o lume avanzase rapidamente, pero nas últimas horas mudou a dirección, polo que ese cambio podería favorecer o control do incendio.