Un mariñeiro morto e outro desaparecido despois de afundirse a súa embarcación preto das Cíes

Imagen de archivo de un helicóptero de Salvamento Marítimo

  • Unha persoa particular alertaba ao 112 dun posible problema ao non atopar o barco na súa base

Os servizos de emerxencia localizaron este luns o corpo sen vida dun mariñeiro que faleceu ao afundirse o barco no que faenaba nas proximidades das Illas Cíes. Ademais, segundo os datos facilitados ao 112 Galicia, no barco atopábase outro home que permanece desaparecido.

Foi unha persoa particular quen deu a voz de alarma ao 112 Galicia preto das 16:40 horas desta tarde, ante a posibilidade de que a tripulación da embarcación houbese sufrido un contratempo mentres faenaban. Indicaba no seu relato que o barco tiña que estar de volta na súa base ao mediodía e aínda non chegara.

Decontado, os xestores do CIAE 112 Galicia pasaron o aviso a Salvamento Marítimo e ao Servizo de Gardacostas de Galicia, que mobilizaron a Salvamar Mirach e o helicóptero Pesca I, respectivamente. Ademais, desde o 112 Galicia se puxo a situación en coñecemento da Garda Civil, da Policía Local e da Agrupación de Voluntarios de Protección Civil do Val Miñor.

Segundo se lle indicou ao 112 Galicia, o corpo do mariñeiro falecido foi localizado polo Pesca I preto das Illas Cíes e rescatado pola Salvamar Mirach. Arestora, continúa a busca do outro membro da tripulación.