Unha muller de 71 anos, veciña da Coruña, perdeu a vida e outras dúas resultaron feridas na mañá deste sábado ao colisionar por alcance dous coches na A-6, á altura de Guitiriz.
Segundo a información recollida no 112 Galicia, os Bombeiros de Vilalba interviñeron para liberar a unha das persoas accidentadas, ao quedar atrapada no interior dun dos vehículos sinistrados.
O accidente tivo lugar á unha menos cuarto á altura da parroquia de Trasparga, no punto quilométrico 529 da autovía, en sentido a Lugo. Cómpre sinalar que foi necesario interromper o tráfico nun dos carrís neste sentido da circulación, para asegurar as condicións de seguridade na zona onde tiveron lugar os feitos.
Nada máis recibir a alerta do accidente a través de varias persoas particulares, os xestores do CIAE 112 Galicia solicitaron a intervención de Urxencias Sanitarias de Galicia-061, dos Bombeiros de Vilalba, da Garda Civil de Tráfico e do servizo de mantemento da vía.