Nas primeiras horas deste domingo, oito persoas resultaron afectadas de diversa consideración, entre elas unha menor, e todo un edificio foi desaloxado a causa dun incendio que consumiu un piso no concello de Monforte de Lemos, en Lugo. Unha desas persoas, un home de 52 anos, faleceu por mor das lesións sufridas.
O 112 Galicia recibiu a alerta ás 07:30 horas deste domingo e decontado púxose en marcha un operativo no que participaron Bombeiros de Monforte de Lemos e os axentes da Policía Local e Nacional, que confirmaron o desaloxo do edificio de tres plantas no que se declarou o lume.
Pola súa banda, os profesionais de Urxencias Sanitarias de Galicia-061 ocupáronse do traslado de sete das persoas que resultaron afectadas, mentres que os bombeiros fixeron fronte ás lapas. De acordo coa Policía Local, unha menor foi evacuada ao hospital por particulares.
Os equipos de emerxencias indicaron ao 112 Galicia que o incendio consumiu totalmente un salón localizado no primeiro andar da vivenda e que a acumulación de fume no seu interior afectou por completo ás demais estancias.
Desde o 112 pasouse tamén aviso aos Bombeiros de Chantada e aos efectivos de Protección Civil da localidade, por se fose necesaria a súa colaboración.
Segundo a información facilitada ao 112, as forzas da orde tratan de aclarar as circunstancias do suceso.