O Concello de Vimianzo presentou, na mañá deste sábado, a programación de Nadal deste ano, unha proposta cargada de actividades para todos os públicos. Baixo a idea dun Nadal que fará “brillar” Vimianzo, a programación inclúe múltiples propostas que encherán as rúas de vida, maxia e espírito festivo.
“Trátase dunha programación que reforza o noso compromiso coa cultura, o comercio local e a dinamización social, consolidando Vimianzo como un referente na Costa da Morte durante unhas datas tan especiais coma estas”, sinalou a alcaldesa, Mónica Rodríguez, que agradeceu a implicación “de todas as persoas que fan posible que hoxe presentemos unha axenda coma esta. Teremos actividades para gozar en familia, espectáculos para os máis pequenos, música… todo para vivir, un ano máis, un Nadal máxico”.
A concelleira de Cultura, Rosa Blanco, puxo en valor o Nadal como “un punto de encontro dos nosos veciños e veciñas, pero tamén dos centos de persoas que nos visitan. É unha oportunidade para fortalecer o tecido comercial e mostrar todo o potencial de Vimianzo, un lugar vivo, acolledor e repleto de emocións”.
Actividades xerais
O gran acendido do alumeado marcará o comezo do Nadal en Vimianzo. Será o venres 5 de decembro ás 20:00 horas na praza do Concello. No momento de premer o botón iluminarase a gran carpa, onde tamén terá lugar o espectáculo ‘Tibu e os seus amigos’ e unha gran chocolatada de balde. Procederase, do mesmo xeito, á apertura do Recuncho Gastronómico.
O día 6 terá lugar a presentación da campaña Mercabolas, pensada para dinamizar a actividade no comercio de proximidade nestas datas tan importantes.
O día 12 de decembro darán comezo os Cantos de Nadal, que ata o día 22 de decembro irán percorrendo cada unha das parroquias. Este ano preséntanse cunha novidade moi especial: o teatro será o gran protagonista. Teresa, Sara e Caridad, integrantes de Teté Teatro, serán as encargadas de divertir aos veciños e veciñas cos seus “sketchs”. O grupo de gaitas O Revoltixo de Carantoña encargarase de poñer o toque musical ás xornadas.
O luns 15 de decembro é outra das datas máis agardadas pola cativada, xa que terá lugar a gran inauguración da pista de xeo. Será ás 17:00 horas.
Papá Noel xa reservou o seu billete para vir dende Laponia a visitar aos pequenos e pequenas de Vimianzo. O 16 e 17 de decembro farao por videoconferencia co alumnado do CEIP San Vicenzo e Baíñas e os días 18 e 19 achegarase presencialmente ao CEIP Baíñas, EI Os Vimianziños, Vivenda Comunitaria, Residencia de maiores, CEIP San Vicenzo e EEI Carantoña.
O 23 de decembro, ás 11:00 horas, terá lugar o acendido do Cepo de Nadal na lareira do Castelo.
Un ano máis ofrecerase o Concilia Nadal os días 22, 23, 26, 29 e 30 de decembro e 2 e 7 de xaneiro, no que os pequenos e pequenas poderán gozar de actividades lúdicas coas que se busca favorecer a conciliación laboral e familiar. O horario será de 10:00 a 14:00 horas, con posibilidade de ter servizo de madrugadores dende as 8:00 horas para aquelas familias que así o precisen. As inscricións pódense realizar ata o 15 de decembro na Casa da Cultura. Ata ese día estará tamén aberto o prazo de solicitude para o obradoiro de cine práctico, que terá lugar os días 22 e 23 de decembro e está dirixido á mocidade de 12 a 17 anos.
A cabalgata de Reis será o 5 de xaneiro, cando as Súas Maxestades irán visitando todas as parroquias dende as 10:00 horas.
O dúatlon de Reis será o 11 de xaneiro de 2026.
Actividades no Recuncho Gastronómico
O Recuncho Gastronómico consolidouse coma un espazo de encontro e xuntanza no que compartir momentos inesquecibles. Tras a súa apertura o día do acendido, o primeiro en actuar será o Mago Charly Braun, que presentará ao público vimiancés o seu espectáculo ‘The Polar Express Magic’.
As actuacións continuarán o sábado 13 de decembro cunha gran festa infantil da man de Javi Solla. O día seguinte, domingo 14, ás 18:00 horas, a Asociación Cultural A Trubisquiña será a protagonista co seu concerto de Nadal.
Continuando con actuacións musicais, o sábado 20 de decembro, ás 21:00 horas, será a quenda de Alana. O luns, día 22, ás 20:00 horas, rematarán os Cantos de Nadal coa actuación de Teté Teatro e o grupo de gaitas O Revoltixo de Carantoña.
O 23 de decembro será Papá Noel o protagonista, que se encargará de animar ao público de 17:00 a 19:00 horas. O día 24 a festa comezará xa de mañá, de 11:30 a 12:30 cunha gran festa co Teatro Calavera. Ás 13:00 horas haberá unha recepción a Papá Noel, que fará outra gran festa de 17:00 a 19:00 horas.
O venres 26 de decembro, ás 21:00 horas, terá lugar a actuación de Suso Andrea e, ao día seguinte, sábado 27, haberá monólogos da man do grupo Mortos de Risa Camelle. O domingo 28, ás 18:00 horas, Redrum Teatro presentará o seu espectáculo ‘Os contos do Lobicán’.
O 31 de decembro despedimos o 2025 cunha gran festa infantil con Peque Disco Moc Moc and Remember Temazos 90-2000 de 11:30 a 13:30 horas. Ás 13:00 horas haberá un pequeno parón para facer as tradicionais prebadaladas.
O ano comeza coa música como protagonista. O venres 2 terá lugar o concerto de Dúo de Festa, o dábado 3 será o Concerto de Nadal con Irma Macías e Luís Pinto e o domingo 4 será ‘Kamishibai do Nadal’ con Juan Juste.
O último concerto será o sábado 10 de xaneiro, cando se celebrará a despedida do Nadal con DJ Rokiño.
Actividades na Casa da Cultura e Auditorio
A Casa da Cultura e o Auditorio tamén serán espazos moi sinalados durante a programación. O día 6 de decembro, de 18:30 a 21:00 horas, acollerá o monólogo ‘Aquí tou’, de José A. Touriñán.
O día 21 celebrarase para os máis pequenos o espectáculo ‘As lambetadas de Nadal’, Os Bolechas; e o día 26, de 17:00 a 19:30 horas, o musical infantil ‘The Grinch. Un cuento de Navidad’. As entradas para este espectáculo pódense adquirir en ataquilla.com.
A sala de exposicións Antón Mouzo acollerá a entrega de premios do concurso de fotografía ‘Luz na soidade’ o día 19 e de postais de Nadal o día 21.