- Outro traballador tamén resultou ferido de gravidade en Verín ao caer dunha escaleira
Un operario faleceu este xoves ao mediodía ao recibir un golpe coa póla dunha árbore, mentres se atopaba traballando nunha zona de monte, no Lugar de Porcar, en Cabanas.
Foi un compañeiro quen alertou ao 112 Galicia que, de inmediato, solicitou a intervención dos profesionais de Urxencias Sanitarias de Galicia-061, que nada puideron facer por salvar a vida do traballador.
Tamén foron avisados os Bombeiros do Eume e os axentes da Policía Local e a Garda Civil co fin de coñecer todos os detalles do accidente.
Ferido grave en Verín
Por outra banda, o 112 Galicia tivo coñecemento doutro accidente laboral que se saldou cunha persoa ferida grave. Neste caso, foi un operario que estaba a retirar un farol no Camiño de San Gregorio cando caeu da escaleira que utilizaba. O golpe ocasionoulle lesións importantes, polo que foi evacuado ao centro hospitalario de referencia.