Un traballador morre despois de envorcar o seu camión nunha nave do Porriño

Un home faleceu este venres despois de quedar atrapado baixo o camión que manexaba no interior dunha nave do Polígono de As Gándaras, no Porriño.

O suceso produciuse minutos antes das nove desta mañá, tal e como indicaron as persoas que contactaron co 112 Galicia para pedir axuda urxente.

Os Bombeiros do Baixo Miño acudiron ao accidente para liberar a vítima, que permanecía atrapada baixo o camión cargado con material pesado. Os efectivos do parque porriñés lograron rescatar ao traballador, pero nada se puido facer por salvarlle a vida.

Ademais dos bombeiros, desde o 112 Galicia avisouse aos profesionais de Urxencias Sanitarias de Galicia-061, así como aos axentes da Garda Civil, que tratan de coñecer todos os detalles deste suceso.