O aviso do accidente produciuse á primeira hora da mañá deste domingo, un particular alertou ao 112 da saída desta vía dun turismo Citroën C4. Polas pegadas no lugar, todo apunta a que o vehículo que circulaba sentido ao lugar de Ferradal, en Bértoa, saíuse da vía pola súa marxe dereita, levouse por diante un sinal de tráfico (un espello) e tras caer por un desnivel duns catro metros continuou a súa traxectoria por unha leira. Cando levaba máis de 30 metros percorridos por fóra da calzada o vehículo impactou de forma violenta contra unha pedra-mouteira e terminou envorcado sobre o teito. Un mozo de 18 anos, veciño de Berdillo, e único ocupante do turismo puido saír do coche polos seus propios medios, aínda que foi trasladado ao centro médico para a súa avaliación, pero en principio o seu estado non revestía gravidade. Ao lugar acudiron sanitarios do 061, a Policía Local e os Bombeiros de Carballo.
Lugar da saída da vía do turismo.