Dúas mulleres morreron e sete persoas resultaron feridas de distinta consideración nun accidente provocado por un turismo que circulaba en sentido contrario pola autovía A-4 en Xerez da Fronteira.
O 112 de Emerxencias de Andalucía recibiu a primeira de varias chamadas pasadas as tres e media da tarde deste domingo que avisaban de que un vehículo circulaba en sentido contrario pola A-4 en sentido Sevilla, á altura de Xerez.
No accidente víronse implicados varios coches. Ata a zona desprazáronse efectivos dos Bombeiros, a Garda Civil de Tráfico e os servizos sanitarios con varias ambulancias para atender os feridos.
Os sanitarios confirmaron que como consecuencia do impacto perderan a vida dúas mulleres de 56 e de 75 anos no lugar do accidente, sen que se puidera facer nada por salvarlles a vida.
Sete persoas quedaron feridas de distinta consideración, entre elas un cativo de seis anos. Todos foron evacuados a distintos hospitais de Xerez, Puerto Real e Cádiz.