- Sucedeu sobre as 16:30 horas deste mércores no punto quilómetro 17 da A-55, dirección Vigo
Tres vehículos, dous turismos e un camión, víronse implicados nun accidente de tráfico na A-55, ao seu paso pola parroquia de Torneiros, no concello pontevedrés do Porriño. Como consecuencia do accidente dúas persoas resultaron feridas e tiveron que ser evacuadas ao Hospital Álvaro Cunqueiro.
A alerta sobre este accidente activouse no 112 Galicia ás 16:30 horas deste mércores despois das chamadas de varias testemuñas do sinistro. Nada máis ter constancia dos feitos, desde o 112 pasouse aviso aos profesionais de Urxencias Sanitarias de Galicia-061, aos Bombeiros do Porriño e aos axentes da Garda Civil de Tráfico e da Policía Local.
Para restablecer as condicións de seguridade na vía, concretamente no punto quilométrico 17 dirección Vigo, foi necesaria a intervención do equipo de mantemento das estradas.