Milleiros de persoas saíron este domingo ás rúas de Santiago en solidariedade con Palestina, nunha manifestación unitaria convocada pola Coordinadora Galega de Solidariedade con Palestina para condenar «o xenocidio e a ocupación» neste territorio por parte do Estado de Israel. Unha faixa co lema «Galiza con Palestina. Contra o xenocidio e a ocupación« partiu pasadas as doce do mediodía da alameda da capital galega, onde os manifestantes, en moitos casos portando bandeiras ou ataviados co pano palestino tradicional, concentráronse un tempo antes do inicio da protesta. Acto seguido continuaron avanzando ata desembocar na praza do Obradoiro, ao pé da catedral de Santiago, onde se ergueu un escenario para a lectura dos manifestos, nos que lle pediron ao Goberno que rache todo tipo de relación bilateral co Estado de Israel. Segundo a plataforma organizadora, subscribiron a convocatoria preto de 80.000 persoas, unha cifra que a policía local rebaixaba a 15.000. En declaracións aos medios previas ao comezo da marcha, Óscar Valadares, membro da coordinadora, apuntou que esta protesta é «a culminación de dous anos de traballo», nos que organizaron máis de 1.100 convocatorias para denunciar a situación que se está vivindo en Palestina. Con todo, observou que esta «non é a última» acción que se vai a preparar, posto que non aprecia «unha perspectiva» de que vaia cambiar a situación.