Ás 5 da madrugada deste domingo tivo lugar un accidente consistente en alcance e arrollamento dunha locomotora a un turismo, na liña férrea (Palencia-A Coruña), á altura do km. 530,100. A mesma circulaba en sentido decrecente cara a Palencia, cando o seu condutor se decatou da presenza dun turismo na vía, inmediatamente accionou o sistema de freado, non podendo evitar a colisión co vehículo.
Como resultado do impacto, o condutor do turismo foi evacuado ao Chuac debido á gravidade das lesións, non teméndose pola súa vida. Unha vez que o persoal médico lle realizou as probas e coidados pertinentes, autorizou ao Equipo de atestados da Plana Maior do Subsector de Tráfico da Garda Civil da Coruña, á realización das probas de detección de consumo de alcol e drogas, dando positivo, en ambas, as mesmas probas fóronlle realizadas ao maquinista da locomotora, dando neste caso negativo nas dúas.
A vía do tren permaneceu cortada ata as 10:15 horas, quedando posteriormente restablecido o tráfico ferroviario, tras desbloquear os técnicos o sistema de freado da locomotora e a retirada do vehículo da vía. A investigación realizada polo mencionado Equipo será posta ao dispor do Xulgado de Instrución de garda de Betanzos.