A condutora dun turismo perdeu a vida ao mediodía deste domingo despois de envorcar o vehículo no que viaxaba mentres circulaba pola N-550, á altura da rotonda de desvío para o Aeroporto de Alvedro, no concello coruñés de Culleredo.
Foi un particular quen chamou ao 112 Galicia para alertar do accidente. Segundo o seu relato, a muller quedou atrapada e necesitaba axuda para abandonar o turismo.
Deste xeito, os xestores do 112 Galicia puxeron os feitos en coñecemento dos profesionais de Urxencias Sanitarias de Galicia-061 e dos Bombeiros de Arteixo.
Unha vez no lugar dos feitos os efectivos do Servizo de Prevención Extinción de Incendios e Salvamento trataron de usar o material de excarceración para liberar a vítima, pero, desafortunadamente, nada se puido facer por salvarlle a vida.
Neste operativo colaboraron tamén os axentes da Garda Civil de Tráfico e da Policía Local ademais do servizo de mantemento da vía.