O accidente ocorreu uns minutos despois das 11:00 horas deste luns e nel houbo dous feridos. Segundo a información recollida polo 112 Galicia, producírase un sinistro entre dous turismos no quilómetro 15 da AP-9, con posibles atrapados.
Sen agardar, os xestores do 112 Galicia solicitaron a intervención do Servizo de Urxencias Sanitarias de Galicia-061, dos Bombeiros de Betanzos e da Garda Civil de Tráfico.
A dotación de bombeiros encargouse de liberar a unha das vítimas, facendo uso do material de excarceración. Non foi o único ferido, xa que o persoal sanitario indicou que tivo que atender a un total de dúas persoas implicadas no accidente.