Unha persoa faleceu na tarde deste mércores despois de sufrir un accidente co tractor que manexaba e rematar atrapada debaixo do vehículo agrícola no concello ourensán de Maceda, precisamente na parroquia de Santiso. Un veciño chamou ao 112 Galicia para pedir asistencia médica urxente para unha persoa que quedara atrapada despois de envorcar o seu tractor.
Ata o lugar desprazáronse os profesionais de Urxencias Sanitarias de Galicia-061, os Bombeiros de San Cibrao das Viñas e os membros de Protección Civil da localidade. De feito, o equipo médico comunicou ao 112 a mobilización do helicóptero medicalizado con base en Ourense para atender á vítima pero, finalmente, tan só puideron confirmar o seu falecemento. Ademais, os equipos de intervención tiveron que facer uso do material de excarceración para liberar á persoa.
Para coñecer as circunstancias que rodearon o suceso, desde o 112 avisouse aos axentes da Garda Civil.