Desde a agrupación de Unidas Podemos de Laxe afirman que defenderán en todo momento iniciativas como o «Proxecto Landras», no que vén colaborando o concello xunto o CPI Cabo de Area e a Asociación Contramínate, así como outras actividades que repercutan na educación e na saúde do medio ambiente no municipio.
O monte da Insua segundo consta no PXOM é un espazo especialmente sensible.
A necesaria limpeza dos plásticos que proceden do antigo vertedoiro de lixo, o clareo do bosque, retirando un número considerable de pinos mortos e enfermos, son traballos pendentes de realizar. «Esixiremos ao concello que aproveite a intervención do Distrito Forestal dependente da Consellería de Medio Rural para executar estes traballos coa maior brevidade posible», afirman dende Podemos.
«Compre planificar o coidado do bosque da Insua. Protexer un lugar de lecer visitado de cotío pola veciñanza. A afluencia de turistas de paseo ó faro, o aparcamento de caravanas, a celebración de botellóns e a instalación de tendas de campaña sen ningún control é habitual na temporada de verán. Todo iso require que se contemple o uso deste espazo na ordenanza municipal. A instalación de fontes de auga nos miradoiros, o control e a limpeza regular (botellas, vasos , deposicións, toalliñas hixiénicas,…) son necesarias e urxentes. Por outra banda a presenza de persoas aumenta o perigo de incendios e a prevención é unha das funcións pola que debe velar o goberno municipal», conclúen.