- Instalaríanse desfibriladores por varios puntos da zona, sobre todo tendo en conta a afluencia de xente que se espera en Santiago con motivo do ano Xacobeo
O alcalde de Santiago, Xosé Sánchez Bugallo, recibiu este xoves ao presidente do Colexio Oficial de Médicos da Coruña, Luciano Vidán, e tamén ao seu vicepresidente primeiro, Francisco Javier de Toro, para falar de posibles colaboracións entre as institucións.
No encontro destacaron dous proxectos principais: converter o casco histórico de Santiago nunha «zona cardioprotexida» e impulsar un plan para mellorar a información da mocidade en torno ás enfermidades de transmisión sexual.
A primeira das propostas, segundo explicou Luciano Vidán, pasaría por habilitar recursos e persoas formadas para converter o casco histórico nunha «zona cardioprotexida», instalando desfibriladores, sobre todo arredor da Catredal, e formando á xente para a súa utilización, tendo en conta a afluencia de visitantes que recibirá Santiago polo ano Xacobeo.
A outra proposta do Colexio é a de promover unha mellor información entre a mocidade de Compostela sobre as enfermidades de transmisión sexual. Tanto Luciano Vidán como Francisco Javier de Toro expresaron a súa preocupación por cifras «alarmantes», que sitúan a cidade en «datos de hai 20 anos». Atribúen o incremento destas enfermidades entre os máis novos ao «acceso temperán á pornografía a través de internet».
O Colexio ten en marcha unha aplicación Android denominada Risco Cero, que ofrece «información veraz e sinxela» sobre sexualidade segura, explicou o seu presidente.
O rexedor tamén se comprometeu a buscar vías de colaboración, a través fundamentalmente dos centros socioculturais, para realizar charlas, conferencias e outras actividades que permitan reforzar a información para a mocidade nesta materia.