Muxía dedica a súa Galería Mulleres do mes de febreiro á figura de Uxía, considerada como «a grande dama da música galega e unha das maiores divulgadoras da súa poesía», sinalan desde o Concello.
Nada en Sanguiñeda (Mos) cursa estudos de Filoloxía Románica na Universidade de Santiago de Compostela, onde coñece a fondo a literatura galega e as súas raíces musicais. A súa carreira empeza oficialmente en 1985, cando gaña o primeiro premio do Festival de Bergantiños. Pouco tempo despois o grupo Na lúa, un dos grandes referentes do folk galego, produce o seu primeiro disco, ‘Foliada de marzo’ (Edigal, 1986), integrándose un ano máis tarde na propia formación.
Na década dos noventa retoma a súa carreira en solitario e publica o seu segundo disco, Entre cidades (Sons Galiza, 1991). Sen embargo, será catro anos máis tarde cando lance un dos seus traballos máis importantes na súa carreira, Estou vivindo no ceo (Nubenegra, 1995), considerado un dos mellores discos da década polas radios públicas europeas.
Uxía crea e dirixe a aclamados grupos tradicionais, como Cantadeiras do Berbés ou Malvela, a Señora Carmen e Emilio Rúa. Sempre comprometida socialmente, é voceira da plataforma ‘Nunca máis’ durante a catástrofe do Prestige e canta nos campamentos de refugiados saharauis en Tinduf en varias ocasións. Na actualidade traballa en varios proxectos que xa están en marcha como son Enredadas, Uxía & Javier Ruibal e o novo cd Alalás de Cantigas do Camiño.