- FAGAL ou AFABER entre outras móstranse preocupadas pola falta de recursos desenvolvidos por equipos especializados
A Federación Alzhéimer Galicia (FAGAL) e a Asociación de Familiares de Enfermos de Alzhéimer (AFABER), xunto cos colexios profesionais de educación social (CEESG), fisioterapeutas (COFIGA), psicoloxía (COPG), terapia ocupacional (COTOGA) e traballo social (COTSG), móstranse preocupados pola falta de recursos terapéuticos desenvolvidos por equipos de profesionais especializados na atención ás demencias neurodexenerativas.
Os avances sociais e sanitarios producidos na sociedade galega durante as últimas décadas transformaron o perfil e necesidades das persoas maiores da comunidade, precisando de novos xeitos de intervención. «A importancia dun envellecemento activo e saudable que sirva para previr e detectar de xeito precoz as demencias neurodexenerativas ten que transformarse nun piar dos servizos de atención sociosanitaria en Galicia», explican desde as entidades. Estas poñen de exemplo as Casas do Maior que, se ben son «unha ferramenta de apoio comunitaria das persoas maiores, sobre todo na loita contra a soidade non desexada», carecen de carácter terapéutico e «non garanten unha atención integral e interdisciplinar».
Por outra banda, tanto FAGAL como outras asociacións demandan o desenvolvemento de recursos especializados de atención a persoas con deterioro cognitivo leve en todo o territorio rural de Galicia debido á alta prevalencia das demencias neurodexenerativas en persoas maiores.