- A iniciativa vai dirixida a 125 centros de toda Galicia que impartan os dous últimos cursos de Primaria e os dous primeiros de ESO.
Os centros que se incorporan a este proxecto serán dotados cos medios tecnolóxicos necesarios na aula para profesorado e alumnado. Ademais, terán acceso a unha contorna virtual de aprendizaxe cos contidos gratuítos proporcionados pola Xunta e deberán utilizar para o desenvolvemento curricular materiais de referencia dixitais, que poden proceder desta contorna ou ser proporcionados polo centro.
Na Costa da Morte incorpóranse a este proxecto o CPI Plurilingüe Cabo da Area de Laxe, o CEIP Ramón Otero Pedrayo e CEIP Alfredo Brañas da Laracha, o CEIP de Gándara-Sofán e o IES Monte Neme de Carballo, o CEIP Plurilingüe de Pino de Val en Mazaricos, O IES Plurilingüe Pedra da Aguia de Camariñas, o IES Eduardo Pondal de Ponteceso, así como o IES Agra de Raíces de Cee.
A incorporación ao E-Dixgal en educación primaria implica impartir todas as materias en modalidade dixital; mentres que facelo en ESO supón impartir un mínimo de seis materias, a elección do centro, en modalidade dixital. Se o centro conta con libros e outros materiais didácticos dixitais, poden empregarse como complemento ou apoio.
Todos os centros implicados no programa teñen acceso á plataforma EVA E-Dixgal, con contidos de aulaPlaneta, Netex, Edebé e Pearson; ademais de ter acceso aos contidos xerados na iniciativa Dixit.