A Consellería de Educación, Universidade e Formación Profesional publica a resolución dos centros que van desenvolver o programa Radio na Biblio ao longo do curso 2019/20. En total serán 80 os centros públicos de toda Galicia – 30 deles de nova incorporación- que participen nesta iniciativa, que ten como obxectivo impulsar a creación de emisoras ou laboratorios radiofónicos no contexto da biblioteca escolar. Na provincia da Coruña incorpóranse ao programa 13 centros e outros 17 renovan a súa participación. Entre os centros que renovan están o CPI As Revoltas de Cabana de Bergantiños, o CEIP Víctor Sáenz de Mazaricos, o CEIP Plurilingüe Pepe de Xan Baña de Santa Comba, o CEIP Canosa-Rus de Coristanco, o CEIP Milladoiro de Malpica e o IES Isidro Parga Pondal de Carballo.
Nova incorporación
Os centros de nova incorporación recibirán fondos para a posta en marcha dun laboratorio de radio. Para iso contarán co apoio da Asesoría de Bibliotecas Escolares da Consellería, que orientará o seu desenvolvemento e porá á súa disposición recursos e propostas. Entre estos centros están o CPI Plurilingüe da Picota en Mazaricos e o CPI de Zas.