A Asociación Vieiro dentro da súa programación no ámbito escolar, comezou no CEIP “Otero Pedraio” da Laracha e no CPI “Alcalde Xosé Pichel” de Coristanco o programa destinado ao alumnado de 1.º e 2.º de Educación Primaria, “O labirinto das emocións”; que se levará a cabo durante o 2.º trimestre do curso escolar 2022-2023.
O obxectivo deste programa é contribuír ao coñecemento das emocións básicas, recoñecer como se manifestan en cada un/a e nos demais e coñecer ferramentas para a súa xestión.
Con “o labirinto das emocións”, a Asociación Vieiro traballa a prevención en condutas de risco desde idades máis temperás a través do coñecemento das emocións, favorecendo así os factores de protección fronte a condutas ou situacións de risco.
Este programa está composto por 5 sesións de 55 minutos con periodicidade semanal nas que se traballan a través de contos as 5 emocións básicas: noxo, alegría, tristeza, ira e medo. Trátase de que o alumnado aprenda a expresar correctamente as súas emocións, que os nenos/as falen do que senten, e a partir de aí comprender que eses sentimentos son compartidos polos seus compañeiros/as e que existen diferentes formas de reaccionar ante eles.
A asociación Vieiro agradece a acollida, resposta e a excelente disposición dos centros educativos, así como todas as facilidades dadas polos equipos directivos e claustro de profesores/as para poder participar neste programa.