Vigo | Aparece un home morto con signos de violencia nun piso da rúa Areal, hai un detido


Un home de 69 anos apareceu morto nun piso da rúa Areal de Vigo con feridas de arma branca, segundo confirmou a Policía Nacional. Ao lugar dos feitos acudiron efectivos das Policías Científica e Xudicial para tratar de esclarecer as circunstancias que rodean o suceso; tamén se desprazou ao momento a xuíza de garda, para proceder ao levantamento do cadáver. Todos os indicios apuntan a que se trata dun crime. O corpo foi achado preto das 21:00 horas deste martes nun apartamento situado no número 136 da citada rúa. Axentes da Benemérita interceptaron este mércores a varias persoas en Silleda coa súa documentación, unha das cales, un mozo de 21 anos, foi detido por usurpación de identidade e como presunto autor de homicidio. Así o manifestaron fontes da Policía Nacional e da Garda Civil. As dilixencias atópanse baixo segredo de sumario e a instrución corresponde ao Xulgado de Instrución número 5 de Vigo.