O Equipo ROCA da Garda Civil de Carballo en colaboración coa Garda Civil de Corcubión detivo a unha persoa veciña de Fisterra, como presunta autora dun delito de roubo con forza. Os feitos ocorreron o pasado 26 de novembro, cando autor ou autores descoñecidos accederon ao interior dun establecemento comercial tras fracturar as ventás do mesmo, subtraendo do interior tres televisores Smart Tv, valorados en máis de 3.000 euros.
A Garda Civil investigou os feitos en aras de lograr a identificación plena do autor ou autores e a recuperación dos efectos subtraídos, polo que no transcurso da investigación solicitaron información que permitiu a localización dun dos televisores, continuando con xestións para a identificación do autor do ilícito e a recuperación dos outros obxectos subtraídos.
Tras a análise da información solicitada, a Garda Civil logrou a identificación plena do autor dos feitos, procedendo á súa detención como suposto autor dun delito de roubo con forza. O detido, xunto coas actuacións realizadas, foi posto ao dispor do Xulgado de Instrución de garda de Corcubión. A Garda Civil reintegrou o televisor recuperado ao seu lexítimo dono, continuando coas xestións para a recuperación dos outros dous televisores subtraídos.