Mozos e mozas xadrecistas da Baña, Negreira e Portomouro conformaron o equipo que se alzou coa vitoria no I Torneo Provincial de Xogade de Xadrez, celebrado a través de Internet. O equipo Xadrez Negreira, no que participaban os veciños da Baña Sergio, Noel e Álvaro, logrou o primeiro posto na categoría Sub 10.
Arredor de 150 nenos e nenas da provincia da Coruña participaron neste torneo en liña provincial en dúas categorías, Sub 10 e Sub 14. A primeira das modalidades disputouse nunha fase única, mentres que a Sub 14 tivo unha primeira fase e unha fase final, na que se enfrontaron de maneira directa os primeiros catro clasificados. O torneo disputouse a través da páxina web lichess.org que, aínda que é gratuíta, precisa inscrición previa.