A Xunta de Galicia e o Concello de Santiago decidiron cal será o ámbito no que se vai a desenvolver a ampliación do polígono industrial da Sionlla, que terá unha superficie estimada duns 400.000 metros cadrados.
Este foi o principal acordo da reunión que mantiveron a conselleira de Medio Ambiente, Territorio e Vivenda, Ángeles Vázquez, e o alcalde compostelán, Xosé Sánchez Bugallo, que coincidiron en que a zona proposta polo Instituto Galego da Vivenda e Solo (IGVS) como primeira opción é a localización “máis adecuada” para planificar o futuro crecemento do parque empresarial, xa que, ademais, atópase moi próxima ao chan actualmente desenvolvido, o que facilitará a súa continuidade.
Neste sentido, tanto a responsable autonómica como o rexedor subliñaron a necesidade de impulsar unha ampliación na Sionlla que responda á demanda de chan industrial que se está rexistrando nesta zona e para favorecer a implantación de novos proxectos empresariais na capital galega.