A secretaria xeral da Igualdade, Susana López Abella, e a responsable da área de violencia de xénero da Delegación do Goberno, María Debén, mantiveron unha xuntanza de traballo para seguir mellorando a coordinación ante a violencia de xénero. No encontro tamén tomaron parte as responsables de violencia sobre a muller das subdelegacións provinciais.
A Xunta defende que a eliminación da violencia contra a muller é un reto conxunto da sociedade, que require da acción unitaria, a máxima coordinación e cooperación por parte das institucións públicas, segundo o seu ámbito e competencia. Para conseguir avances e unha atención integral ás vítimas, é necesario acadar un compromiso desde todos os ámbitos, alcanzar acordos e impulsar a loita contra a violencia de xénero como un asunto prioritario na axenda.
