A formación municipalista Xuntos Carballo M+J, percorreu varios lugares da parroquia de Ardaña, desde onde lle chegaron varias queixas veciñais. En está ocasión Xesús Deus Gende, José Luis Bardanca, Marco Bardanca Mato e a responsable de zona e número catro da candidatura Nieves Sánchez Calle, puideron comprobar en primeira persoa tales reivindicacións.
As demandas máis significativas fan referencia a un maior control sobre o punto onde está prohibido depositar residuos de distinta índole, situado na vía que leva a Esteves, que aínda que foron recollidos os vellos electrodomésticos, agora foron depositados entullos en sacos.
Falta de cobertura móbil e fibra en varias zonas, contedores sen ancoraxes que poden causar danos, firme en mal estado entre O Castro e Rús… En Noví fai falta un tapado de fochancas, a iluminación pública en certas zonas da Cesta e Gontade faise escasa e no lugar de San Lois son varias as deficiencias, tales como o incumprimento de retirada de maleza e especies arbóreas que ameazan varias vivendas, a presenza de entulleiras incontroladas de lixo ou a falta de protección da fonte situada nun monte próximo. Así mesmo onde se construíu a rede de saneamento os veciños/as quéixanse da falta de información e a carencia de enganches que permitan conectarse á rede.
«Outra vez atopámonos con numerosas carencias nas diferentes parroquias. Necesitamos menos propaganda, fotos, manipulación mediática e máis actuacións. Pedimos máis control por parte dos diferentes responsables actuais do goberno municipal, que para iso lles pagamos», sinala Xesús Deus Gende.