O Concello de Zas vén de clausurar este mércores, 1 de abril, unha nova edición dos campamentos de Semana Santa, unha iniciativa posta en marcha polo goberno municipal co obxectivo de facilitar a conciliación da vida familiar e laboral durante o período vacacional.
Nesta edición participaron un total de 61 nenos e nenas de entre 3 e 10 anos, repartidos entre as dúas sedes habilitadas. En concreto, 32 cativos e cativas asistiron ás actividades organizadas en Zas, mentres que outros 29 fixérono en Baio. Os campamentos desenvolvéronse nos Centros Sociais de ambas localidades, onde os máis pequenos puideron desfrutar dunha ampla programación de actividades educativas e de lecer.
O Concello de Zas apostou unha vez máis por ofrecer ás familias unha alternativa de ocio educativo de calidade, favorecendo ao mesmo tempo a conciliación familiar. Como en edicións anteriores, unha das máximas do programa foi garantir o acceso universal, permitindo a participación de todas as familias do municipio sen que a súa situación económica supoña unha limitación.
O alcalde de Zas, Manuel Muiño, destacou a boa acollida da iniciativa e a importancia deste tipo de programas: “Desde o Concello seguimos traballando para apoiar ás familias, especialmente en períodos non lectivos, ofrecendo recursos que lles permitan conciliar con garantías. Estes campamentos non só facilitan a organización familiar, senón que tamén ofrecen aos nenos e nenas un espazo seguro onde aprender e divertirse”.
Muiño tamén puxo en valor o carácter inclusivo da proposta: “Para nós é fundamental que todos os nenos e nenas teñan as mesmas oportunidades de participar, independentemente da situación económica das súas familias. Por iso, seguimos apostando por programas accesibles e pensados para toda a veciñanza”.