O evento celebrarase en Baio do 23 ao 25 de outubro de 2025 e repartirá 1.800€ en premios. O festival aposta por un formato semellante ao do ano pasado, que tivo tan boa acollida, e que combina curtametraxes dentro e fóra de competición, actividades lúdicas relacionadas co cinema e moita música.
O festival botará a andar o xoves 23 de outubro coa proxección de Pura, curtametraxe de Carmen Méndez gañadora dos Mestre Mateo este 2025. Despois do pase haberá un coloquio coa directora.
O venres 24 teremos unha sesión de catro curtametraxes que conectan no concepto de diversidade: ‘Delincuente’, de Alba Domínguez e Nuria Vil; ‘O Coidado’, de Miguel Canalejo; ‘Abellón’, de Fon Cortizo e ‘La casa de la abuela’, de Ashling Ocampo. A noite rematará cun concerto da cantante coruñesa Sofi Peries e un concurso de karaoke cinéfilo.
O prato forte do festival é o sábado 25, coa proxección das curtas presentadas a concurso e a gran festa final na que actuarán Antía Muíño, Ulex, 9Louro e Tonita, conformando un cartel que aposta polos novos talentos e a música en galego. Antes, a mediodía, tamén haberá a proxección da curtametraxe do obradoiro infantil de cinema e a peza ‘Un peixe é un peixe é un peixe’ de Marilar Alexandre e Alberto Pombo, gravada en Fisterra.
O equipo dos Fouciño anunciou a programación durante un acto dedicado ao propio certame baiés que se celebrou dentro da Semana Cultural de Zas. O evento contou coa presenza do Alcalde de Zas, o Concello coorganiza o certame, e pola tarde proxectáronse as tres curtametraxes gañadoras da IV Edición do festival. Muíño destacou o nivel deste certame que sitúa a Baio no mapa do audiovisual.