Zelenski confirmaba este venres nun encontro coa prensa que se reunirá co seu homólogo estadounidense, Donald Trump, o vindeiro domingo na casa de Mar-a-Lago do republicano, en Florida. O dirixente ucraíno adiantou que o plan de 20 puntos de paz presentado por Trump está listo a un 90%, aínda que quere discutir con el as garantías de seguridade e a restauración do país invadido por Rusia. Zelenski sinalou que non pode asegurar que a reunión do domingo vaia conlevar a firma dalgún acordo e quere expor a posibilidade de exercer presión adicional sobre Moscova. Á súa vez, pide aos aliados presionar ao Kremlin para garantir a seguridade durante un posible referendo e as eleccións en Ucraína. Rusia, pola súa banda, acusou a Ucraína de querer «torpedear» as conversacións de paz, sinalando que o novo texto presentado é «radicalmente diferente» do que Moscova negociara cos estadounidenses.