O presidente ucraíno, Volodímir Zelenski, negou este mércores que as súas forzas de seguridade tentasen asasinar o presidente ruso, Vladímir Putin, no suposto ataque con drons contra o Kremlin perpetrado por Kiev, tal e como aseguraron voceiros oficiais de Moscova.
«Nós non atacamos a Putin nin a Moscova, só loitamos no noso territorio, defendemos os nosos pobos e cidades», dixo Zelenski desde Helsinqui nunha rolda de prensa conxunta cos líderes de Finlandia, Dinamarca, Suecia, Noruega e Islandia.
«Non atacamos a Putin, deixámolo para un tribunal», engadiu o líder ucraíno en referencia aos esforzos do seu país para que a comunidade internacional leve a cabo un proceso para axuizar ao presidente ruso pola agresión militar contra Ucraína.
Así mesmo, un voceiro da Presidencia ucraína asegurara previamente que o seu país non ten nada que ver co incidente, asegurando que un ataque deste tipo non cumpriría ningunha función militar nin cambiaría nada no campo de batalla, salvo que animaría aos rusos para tomar «accións máis radicais».