O Departamento de Competicións da Real Federación Española de Balonmán desenvolveu este luns o sorteo da fase de ascenso á División de Honra Prata Masculina, cun total de 12 equipos en pugna por tres prazas para militar a próxima campaña na categoría de prata do balonmán masculino español. Organizan cada un dos tres grupos da fase de ascenso o Calvo Xiria (Carballo), o Gourmet Ampate Lanzarote (Arrecife) e o Caserio de Ciudad Real entre o 4 e o 6 de xuño. Carballo será por tanto, a sede do grupo I no que estarán o Calvo Xiria como conxunto local xunto a Handbol Sant Quirze, Maracena Esquinita de Javi e Levante Marni. Será a sétima fase de ascenso á segunda máxima categoría do balonmán nacional que dispute o club carballés e que está convencido de que “desta vai”. Ascenderá o primeiro clasificado de cada grupo.
