O vicepresidente primeiro e conselleiro de Economía, Industria e Innovación, Francisco Conde, mantivo un encontro en Sober co Consorcio de Turismo da Ribeira Sacra para avaliar a candidatura do proxecto de mobilidade sustentable, que se vai presentar á segunda convocatoria do programa Moves Singulares.
Deste xeito analizáronse os elementos necesarios para presentar a mellor candidatura posible deste proxecto vital para que veciños e visitantes poidan desprazarse de xeito limpo, eficiente e seguro por esta zona de grandes valores naturais, culturais e paisaxísticos.
O proxecto, cun orzamento de 6 M€, busca a redución da presenza de vehículos privados a favor dun transporte colectivo eléctrico e a transformación do seu servizo recreativo: o catamarán turístico. Deste xeito, contempla o uso de barcos eléctricos, electrobarcas de paso, buses eléctricos e a dotación dos intercambiadores e pantaláns con puntos de recarga. O impulso da mobilidade eléctrica é un dos obxectivos recollidos na Axenda Enerxética de Galicia 2030.