Pedro Sánchez mantivo en Roma unha reunión bilateral coa presidenta do Consello de Ministros de Italia, Giorgia Meloni. Este encontro, que se enmarca na xira preparatoria da presidencia do Consello da UE, prodúcese tras as dúas reunións bilaterais que o presidente do Goberno mantivo cos seus homólogos en Nicosia (Chipre) e A Valeta (Malta). O presidente subliñou que o Mediterráneo é o corazón de Europa e que España, Italia, Malta e Chipre comparten realidade mediterránea e xuntos teñen moito que dicir nas grandes cuestións que hoxe afronta a Unión Europea.
O presidente do Goberno abordou con Giorgia Meloni a situación que Europa atravesa como consecuencia da guerra de Putin. A Unión Europa continuará despregando os esforzos que sexan necesarios para apoiar a Ucraína en todos os ámbitos, tal e como reiterou hoxe Pedro Sánchez. Destacou que este é o momento de demostrar que Europa ten un papel que xogar no mundo, lembrando que hoxe máis que nunca é preciso manterse firmemente unidos.
Neste sentido, o presidente lembrou que a resposta que se deu á crise financeira hai unha década dividiu a Europa en dúas, mentres que, ante a guerra de Putin, os vinte e sete responderon unidos. O presidente subliñou que a transición ecolóxica, a transformación dixital e un crecemento económico sostible e inclusivo brindan a oportunidade de pechar as brechas do pasado e crear unha Europa dunha soa velocidade, lembrando que a unidade permitirá facer fronte a retos comúns como a emerxencia climática.