O ministro de Transportes, Óscar Puente, chegou este venres a Vigo, acompañado dos tres Reis Magos, nunha viaxe de proba do Talgo 106, para anunciar que os novos trens Avril levarán a alta velocidade ata as cidades do Eixo Atlántico -entre Vigo e A Coruña- a partir de marzo. Na estación de Vialia esperábano o alcalde Abel Caballero -“emocionado” polo “momento histórico”- e o candidato do PSOE á presidencia da Xunta, José Ramón Gómez Besteiro, que bicou a locomotora ata en dúas ocasións. Ambos convocaran á prensa, teoricamente, para recibir aos Magos de Oriente. Con todo, esta vez, foron catro. A chegada do tren da serie 106 é a proba de que “xa está listo e entrará en funcionamento en breve”, xa que se están realizando as últimas probas de fiabilidade e seguridade. Trátase de vehículos máis anchos e que permiten gañar 200 prazas por unidade, que servirán para atender a “altísima demanda”, concluíu o ministro.
23