Os datos evidencian que o número de persoas falecidas neste tipo de sinistros permanece estable nun contexto de aumento dos desprazamentos de longo percorrido, do parque de vehículos e do censo de condutores. Pero deixa tamén outro dato que o ministro de Interior, Fernando Grande Marlaska, cualificou de “inadmisible”: un repunte do 19% respecto a 2022 no número de motoristas falecidos, que se converten no colectivo que máis incrementa a súa mortalidade con 45 mortos máis que o ano pasado ata os 299. Os datos publicados agora contabilizan as vítimas rexistradas nas 24 horas seguintes aos sinistros e só en vías interurbanas. O titular de Interior recoñeceu que son “malos datos, como o son todos os anos”, aínda que pediu “contextualizalos” co obxectivo de “adoptar as medidas necesarias e precisas e corrixilos no posible”. Neste sentido, chamou a “evitar distraccións, respectar as normas e usar os sistemas de seguridade”. “Son tres simples elementos que poden rebaixar excesivamente as dramáticas cifras e as traxedias humanas que están detrás”, aseverou.
20