Investigadores da Universidade de Florida (Estados Unidos) e a Universidade Nacional Yang Ming Chiao Tung (Taiwan) desenvolveron un dispositivo portátil que pode detectar biomarcadores de cancro de mama a partir dunha pequena mostra de saliva, en só cinco segundos. O seu deseño de biosensor utiliza compoñentes comúns, como tiras reactivas de glicosa amplamente dispoñibles e a plataforma de hardware e software de código aberto Arduino, polo que o seu custo estimado sería moi barato: apenas 5 euros.
O dispositivo utiliza tiras reactivas de papel tratadas con anticorpos específicos que interactúan cos biomarcadores de cancro específicos. Colócase unha mostra de saliva na tira e envíanse pulsos de electricidade aos puntos de contacto eléctricos do dispositivo biosensor. Estes pulsos fan que os biomarcadores se unan aos anticorpos e alteren a carga e a capacitancia sobre o eléctrodo, o que produce un cambio no sinal de saída, que pode medirse e traducirse en información dixital sobre canto biomarcador está presente.
O biosensor require só unha pinga de saliva e pode proporcionar resultados precisos mesmo se a concentración do biomarcador de cancro na mostra é só unha billonésima parte dun gramo, ou un femtogramo, por mililitro.