O presidente do Goberno, Pedro Sánchez, reuniuse, acompañado pola ministra de Defensa, Margarita Robles, coas principais compañías do sector de defensa en España, ás que agradeceu o seu compromiso, ante o contexto xeopolítico complexo actual, no que España traballa para prepararse ante as posibles ameazas de seguridade e aumentar o nivel de autonomía estratéxica. España quere facer do sector un actor clave na primeira Estratexia Industrial Europea da Defensa, presentada hai apenas uns días.
Na reunión, abordáronse tamén cuestións como a importancia para o sector de aumentar o investimento en capacidade produtiva e I D e de crear emprego, ademais de elevar a participación e o liderado nos grandes programas europeos de defensa.
O presidente puxo en valor o sector de seguridade e defensa española, cuarto exportador europeo e oitavo mundial. Esta industria conta con máis de 400 empresas repartidas por todo o territorio nacional, emprega a máis de 36.000 traballadores de forma directa e xera alta tecnoloxía.
Durante o encontro, Pedro Sánchez reiterou a rotunda condena do Goberno de España á agresión de Rusia contra Ucraína, tras cumprirse hai uns días dous anos do inicio da devandita agresión. Neste sentido, España seguirá defendendo a soberanía e a integridade territorial de Ucraína.