O número de contaxios de Covid-19 segue aumentando cada día en España. Cataluña leva a peor parte, este mesmo mércores rexistráronse case mil novos contaxios e 40 falecidos. Desde agora os habitantes da provincia de Lleida e outros 6 municipios do Segrià terán que permanecer nas súas casas. Non poderán saír dos seus domicilios salvo para o imprescindible. Realizaranse controis nas entradas e saídas das zonas afectadas e pecharán bares e restaurantes. Así o avalou de madrugada o xulgado de garda de Lleida dándolle a razón ao Goberno autonómico de Cataluña. Establece a validez desta ratificación por un prazo de 15 días, que pode ser prorrogado, aínda que esixe á Generalitat que informe semanalmente da evolución da pandemia e das propostas de corrección das medidas acordadas no seu caso. O Goberno catalán aprobou a última hora do luns un decreto lei para impoñer medidas restritivas en municipios do Segrià, en resposta a outra resolución dunha xuíz de Lleida que non validou unha orde do Departamento de Saúde para confinar nos seus domicilios a uns 150.000 habitantes destes municipios leridanos. As autoridades catalás impuxeron restricións á mobilidade, ás reunións de máis de 10 persoas e a determinadas actividades comerciais. Ademais, recoméndase aos cidadáns que eviten pisar a rúa. Aínda que polo momento, resístense a chamalo confinamento domiciliario.
18