Unha muller de 33 anos foi presuntamente asasinada na tarde deste venres na súa vivenda, no municipio coruñés de Oza-Cesuras, un crime que podería ter que ver cun posible roubo e polo que xa hai un sospeitoso detido.
O suceso ocorreu nunha vivenda unifamiliar situada no lugar de Porzomillos, onde residía a muller. Pouco despois do crime, axentes da Policía Xudicial da Garda Civil detiveron o sospeitoso nunha leira próxima. Nun principio, aínda que todas as hipóteses están abertas, descártase que se trate dun caso de violencia de xénero.
Trátase dun suposto tento de roubo na casa onde a vítima, que ten un neno de dous anos, estaba nese momento soa. Ao verse sorprendida polo asaltante pediu axuda e tentou defenderse, pero cando chegaron ao domicilio xa estaba morta. Algúns testemuños avanzaron que na zona había outras dúas persoas dentro dun coche e que se deron á fuga cando comezaron os berros na casa e o ladrón tropezou na fuxida.
O presunto homicida deuse á fuga, aínda que foi interceptado e detido, e tras sufrir algún tipo de indisposición foi atendido nunha ambulancia e posteriormente trasladado ao hospital.