O Concello de Ponteceso e a Deputación da Coruña farán chegar a biografía sobre o almirante Mourelle a todas as bibliotecas públicas e a todos os colexios públicos da Costa da Morte.
Amancio Landín escribiu en galego a historia deste cormelán nun exemplar que acaba de publicarse grazas á colaboración entre a Asociación Insua de Viastela de Corme, o Concello de Ponteceso e a Deputación da Coruña.
Esta primeira edición da obra tamén recolle os diarios orixinais do almirante. Aínda que a presentación oficial do libro vai ser o 3 de decembro no Museo de Arte Contemporánea de Corme, o Concello de Ponteceso púxose en contacto cos centros educativos da Costa da Morte para facerlle chegar un dos exemplares que acaba de recibir.
O alcalde de Ponteceso, Lois García Carballido reuniuse coa directora, Teresa Abelenda, e coa coordinadora de bibliotecas, Silvia Cándida Exposito, do IES Eduardo Pondal de Ponteceso, co director do CEIP As Forcadas (Corme), Manuel Caridad e co director do CEIP Eduardo Pondal, José Manuel Villar, para entregarlle os exemplares e que os poñan á disposición das alumnas e alumnos nas bibliotecas dos centros para que poidan coñecer de preto as fazañas deste ilustre veciño.
O Concello de Ponteceso xa procedeu, en acordo coa Asociación Insua Viastela, que este libro tan fermoso sobre a incrible vida deste mariñeiro Cormelán máis ilustre, puidera ser desfrutada por todos os lectores que desexen ter a obra literaria.