Nos Premios Nacionais de Investigación 2024 foron galardoadas cinco mulleres e cinco homes. Presentáronse un total de 347 candidaturas, das cales 148 foron presentadas por homes e 199 por mulleres. Pola súa banda, na modalidade de Premios Nacionais de Investigación para Mozas, son sete as mulleres galardoadas e tres os homes. Recibíronse 207 candidaturas, 78 procedentes de homes e 129 de mulleres.
No acto, que foi presidido por S.M. o Rei, no Palacio Real do Pardo, a informática carballesa Verónica Bolón Canedo foi galardoada co Premio Nacional de Investigación “María Andresa Casamayor” na área de matemáticas e tecnoloxías da información e as comunicacións.
Verónica actualmente, enfoca a súa investigación nos métodos de aprendizaxe automática, un campo da intelixencia artificial. Nos seus traballos, de clara aplicación social en ámbitos desde a saúde ata o medio ambiente e a educación, propuxo ferramentas de apoio para o diagnóstico de enfermidades como a retinopatía en bebés prematuros e a síndrome do ollo seco, para a detección de verteduras de petróleo no océano e a corrección automática de exames. Ademais, en 2022 foi nomeada Académica Correspondente da Real Academia de Ciencias Exactas, Físicas e Naturais de España.
O xurado de cada modalidade dos Premios estivo presidido pola secretaria xeral de Investigación, Eva Ortega-Paíno, e composto por especialistas en cada área de coñecemento, cunha participación equilibrada entre homes e mulleres.